Прошу прочитать статью:
“İlham Əliyevin Azərbaycan televiziyasına müsahibəsi təsadüfi deyildi. Belə bir həssas məqamda dövlət başçısının müsahibə verməsi həm Türkiyəyə, həm də digərlərinə mesaj idi”. Politoloq Rasim Musabəyov ölkə başçısının Azərbaycan televiziyasına srağagünkü geniş müsahibəsini şərh edərkən belə dedi.Xatırladaq ki, İ.Əliyev müsahibəsində Türkiyə-Ermənistan yaxınlaşmasına sərt reaksiya verərək Ankaraya bəzi mesajlarını çatdırırb. “Bəzən belə fikirlər də səslənir ki, Türkiyə-Ermənistan münasibətlərinin normallaşması, sərhədlərin açılması gələcəkdə Dağlıq Qarabağ münaqişəsinin həllinə kömək göstərə bilər. Mən bu fikirləri bölüşmürəm. Çünki hesab edirəm ki, əgər Türkiyə-Ermənistan münasibətləri Dağlıq Qarabağ məsələsinin həllindən əvvəl tənzimlənərsə, o zaman Ermənistanın mövqeyi danışıqlar prosesində daha da sərtləşə bilər” - deyə, ölkə başçısı bildirib.
İ.Əliyev Türkiyənin Azərbaycan qazını ədalətli olmayan qiymətə aldığını da xatırladıb. Həmçinin əlavə edib ki, Azərbaycan Dağlıq Qarabağ məsələsində ərazi bütövlüyü prinsipindən imtina etməyəcək.
R.Musabəyova görə, bu, həm də Azərbaycan cəmiyyətinə mesaj idi ki, vəziyyət heç də ürəkaçan deyil: “Ancaq mən onun çıxışında bir məqamı müşahidə etdim ki, o, nə ermənilərə güzəştə getmək fikrindədir, nə də kiminsə Azərbaycanın maraqlarını nəzərə almadan siyasət yapmasına göz yumacaq. Məncə, bu, düzgün yanaşmadır”.
Politoloq ermənilərin mövqeyini sərtləşəcəyi haqda fikri isə bölüşmür: “Məgər ermənilər indiyə qədər mövqelərini yumşaldıblarmı ki, bundan sonra sərtləşdirsinlər? Heç bir il əvvəl protokol söhbəti ümumiyyətlə yox idi, ermənilərin mövqeləri yumşaq idi ki, indi sərtləşib? Sərhədlərin açılması qısa müddətdə ermənilərin vəziyyətini dəyişdirməyəcək. Ancaq bu, bizimçün sınaqdır. Dəqiqləşdirəcəyik ki, biz Türkiyə ilə bir gəmidəyik, yoxsa dost ola-ola, ayrı-ayrı gəmidə?”
Musabəyov İ.Əliyevin Türkiyəyə ucuz qiymətə qaz satılması haqda dediklərini haqlı saydı: “Türkiyəyə satılan 7 mlrd. kub m. həcmdə qaz 120 dollardan satılır. Halbuki 350 dollara satılmalı idi. Əslində Türkiyəyə bu qiymətlə qaz verilməsi o deməkdir ki, hər kub m-dən Türkiyə 200 dollar qazanır. Bu, ildə 1 mlrd. dollar edir. Azərbaycan eləmi varlı dövlətdir Türkiyəyə ildə 1 mlrd. dollarlıq hədiyyə etsin? Nəzərə alsaq ki, Türkiyədə adambaşına düşən daxili gəlir Azərbaycandan iki dəfə çoxdur, Bakı niyə belə hədiyyələr etməlidir?”
İ.Əliyev bir məqamı da xatırladıb: “Türkiyənin rəhbərləri rəsmi bəyanatlarda və şəxsi görüşlər əsnasında dəfələrlə bizə bildirmişlər ki, Dağlıq Qarabağ məsələsi həll olunmayana qədər Türkiyə-Ermənistan protokolları məclis tərəfindən təsdiqlənməyəcək və beləliklə sərhədlər açılmayacaq. Bunu Türkiyənin prezidenti demişdi, baş naziri demişdi, Türkiyə parlamentinin sədri demişdi, Türkiyənin xarici işlər naziri demişdi. Biz buna inanırıq. İnanırıq ki, belə də olacaq. Belə olan halda bölgəyə sülh gələ bilər. Belə olan halda bölgədəki bütün ölkələr bu vəziyyətdən uğurla istifadə edib öz aralarında bütün məsələləri həll edə bilərlər. Ancaq bu halda bölgədə genişmiqyaslı əməkdaşlıq yarana bilər”.
Bu fikirləri təqdir edən politoloq qeyd etdi ki, hər bir halda protokolların imzalanması məsələsini qazın qiymətinin qaldırılması ilə qarışdırmaq olmaz: “Azərbaycanın hazırda öz qazımızı ayrı istiqamətə yönəltmək imkanı yoxdur. Ancaq Türkiyənin siyasəti gətirib ona çıxaracaq ki, bəli, bizim Türkiyəyə satış üçün nəinki əlavə qazımız olmayacaq, ayrı istiqamətlərdə əlverişli qiymət təklifi alanda Türkiyəyə göndərilən qazın həcmi azalacaq. İndi xoşlarına gəlir-gəlmir, özləri bilər”.
