“Neftçi”nin düşərgəsində iki legioner
Son vaxtlar heyətini gücləndirmək məsələsinə ciddi girişən “Neftçi” düşərgəsinə iki legioner dəvət edib. Sergey Lutovinovdan fərqli olaraq bu dəfəki əcnəbilər Türkiyədən gəliblər. Cem Kara Aslan və Kurthan Yılmaz hazırda flaqmanın düşərgəsində baxışdan keçirlər. Hər iki futbolçu hücum xəttində yer alır. Doğrudan da hazırda “ağ-qaralar”ın heyətində Qurban Qurbanovu çıxmaqla nominal forvard yoxdur. 1999-2000 mövsümündə “Göztəpə”nin heyətində Türkiyə Superliqasında forma geyən oyunçular son vaxtlar ikinci liqanın “A” kateqoriyası komandalarının şərəfini qoruyublar. Kara Aslan yanvarda “Göztəpə”ni “İngilspor”a dəyişib. Yılmaz isə Bakıya gələnə kimi “Bucaspor”un formasını geyinib. “Neftçi”nin məşqçi-seleksioneri Musa Qurbanov bizimlə söhbətdə yaxın 5 gündə futbolçuların taleyinə aydınlıq gələcəyini söylədi. Bunun üçün isə ilk növbədə baş məşqçi Kazbek Tuayev əcnəbiləri yoxlama görüşündə sınamaq fikirindədir. Yəqin ki, məhz bu səbəbdən komanda bu gün Bakıxanovdakı İsmət Qayıbov adına stadionda əvəzedici heyətlə üz-üzə gələcək. Türklərin bura hansı əlaqələr vasitəsi ilə gəlməsinə gəlincə isə Qurbanovun sözlərinə görə, vaxtilə “Ärzurumspor” da çıxış etmiş Vidadi Rzayev hər iki futbolçunu o vaxtdan tanıyır. Ancaq bu o demək deyil ki, türklər bura məhz Rzayevin vasitəçiliyi ilə gəlib çıxıb. Yığmaya 6 futbolçu göndərən flaqmanın digər üzvləri klubun bazasında təlim-məşq toplanışındadır. Sonda xatırladaq ki, “ağ-qaralar” ölkə çempionatında növbəti oyunu sentyabrın 11-də “Gənclərbirliyi”nə qarşı keçirəcək.
