Qurban Qurbanov avrokuboklarda ilk qolunu MOİK-e vuracağını deyirİyulun 27-də “Neftçi” MOİK-lə qarşılaşmadan qalib ayrıla bilməsə də, azarkeşlər məhz bakılıların növbəti mərhələyə keçəçəyinə inamlarını itirməyiblər. Flaqmanın son məşqini izlədikdən sonra futbolçularda özünəinamın yüksək səviyyədə olması bizi də sevindirdi. “Neftçi” Rusiya paytaxtına yola düşməzdən əvvəl son məşqini Tofiq Bəhramov adına Respublika stadionunda keçirdi. Müdafiəyə xüsusi diqqət Kazbek Tuayevin rəhbərliyi ilə keçən çalışmada futbolçuların çox həvəsli olduğu açıq-aydın hiss olunurdu. Qeyd edək ki, məşqdə Samir əliyev də iştirak edirdi. Tuayevin yetirmələri əvvəlcə topla fərdi təmrinləri yerinə yetirdilər. Məşqin bu bölümündə Rəşad Sadıqov və Qurban Qurbanov topla daha yaxşı davranırdılar. Sonra isə futbolçular iki hissəyə ayrılıb ikitərəfli oyun keçirdilər. Komandanın birini müdafiəçilər (Rəşad Sadıqov, Emin Quliyev, Ruslan Abbasov, İqor Getman), digərini isə hücumameyilli oyunçular (Zaur Tağızadə, Qurban Qurbanov, Mahmud Qurbanov, Vidadi Rzayev) təşkil etmişdilər. Elşən Qəmbərov, Anatoli Tebloyev, Eltay Aslanov, Samir əliyev, Rəşad Sadiqov, Elnur Allahverdiyev və Kamal ələkbərov isə hər iki komandaya köməklik göstərirdilər. Bu oyunda Zaur və Mahmud komanda yoldaşlarına nisbətən daha fəal idilŠr. Ruslan isə bir qədər passiv görünürdü. Bu oyunla Tuayev müdafiəçiləri MOİK-in həmlələrinə hazırlayırdı. Xatırladaq ki, Bakıdakı görüşün heç-heçə (0:0) başa çatmasından sonra “hərbçilər” öz meydançalarında hücum etmək haqda daha çox düşünəcəklər. Bu anlarda isə arxa xətt oyunçularının üzərinə böyük ağırlıq düşəcək. Tuayev oyun haqda heç nə demək istəməsə də, aydındır ki, təcrübəli mütəxəssis əks-hücum taktikası seçəcək. Bütün futbolçular ilk növbədə qapının toxunulmazlığı barədə düşünəcəklər. Məşqin sonunda isə Kazbek müəllim “MOİK”lə oyunda penaltilərin də ola biləcəyini nəzərə alıb futbolçulardan 11 metrlik zərbələr vurmağı tələb etdi. Qeyd edək ki, onların çoxu bu zərbələri dəqiq yerinə yetirdilər. əgər Moskvada oyun sonrası penaltilər olarsa, komandamıza güvənə bilərik. Hüseyn Məhəmmədov: “Rəqibdən çəkinmirik” Baş məşqçi ilə MOİK matçı barədə danışmaq istəsək də, Tuayev buna etiraz etdi. O dedi ki, hər şeyi özünüz gördünüz, taktika və heyət barədə isə mŠtbuata açıqlama verilməyəcək. Onun məsləhətinə əməl edərək avqustun 4-də “Dinamo” stadionunda keçiriləcək MOİK-lə görüş haqda suallarımızı futbolçulara yönəltdik. Mahmud Qurbanov meydançaya yalnız qələbə qazanmaq üçün çıxacaqlarını bildirdi: “Bütün qüvvəmizlə qarşıdakı oyuna hazırlaşırıq. Komandada yaxşı əhval-ruhiyyə mövcuddur. Azarkeşlərimizi sevindirmək üçün əlimizdən gələni əsirgəməyəcəyik. Rəqib meydançasında oynamağımıza baxmayaraq, matça qələbə qazanmaq üçün çıxacağıq. əsas məqsədimiz qol buraxmadan rəqib qapısına yol tapmaqdır. Düzdür, ilk matçda müdafiəyəmeylli oynadıq, bu cür komandalara qarşı belə oynamaq lazımdır. Ancaq növbəti mərhələyə keçəcəyimizə inamım böyükdür”. Çempionun əsas qol ümidi Qurban Qurbanov isə iki oyunluq susqunluğunu Rusiya paytaxtında pozacağını dedi: “Orada bizi çətin oyun gözləyir. Amma əsas odur ki, komandada özünəinam var. əgər özümüzə inanmırıqsa, heç onda meydançaya çıxmağın da mənası yoxdur. Mən də çalışacağam ki, hücumçu kimi sözümü qolla deyim və avrokuboklarda ilk qolum məhz belə əhəmiyyətli oyuna təsadüf etsin”. Tuayevin Cahangir Həsənzadə ilə müqayisədə üstünlük verdiyi Hüseyn Məhəmmədov da MOİK-lə matça xüsusi hazırlaşırdı. O, komandadan kənarda etdiyi məşqdə asmalar zamanı çıxışlarda yol verdiyi səhvlər üzərində işləyirdi. Qolkiper də yoldaşları kimi uğura inanır: “Hazırlıqlar yüksək səviyyədə gedir. Rəqibdən çəkinmirik. Özümüzə güvənimiz tamdır. Orada öz oyunumuzu göstərəcəyik. Çalışacağıq ki, o gün bütün Azərbaycana sevinc bəxş edək. Son vaxtlar çoxları bizdən növbəti mərhələyə keçəcəyimizə inanıb-inanmadığımızı soruşur. Mən bildirmək istəyirəm ki, biz peşəkar futbolçularıq və bu işdən pul qazanırıq. Ona görə də işimizə ciddi yanaşırıq və inamsızlıqdan söhbət gedə bilməz. Mən isə əvvəlki görüşlərdəki kimi, əlimdən gələni edəcəyəm”. Elçin RŠhmanov zədələndi ”Neftçi” MOİK-lə oyun qabağı itki ilə üzləşib. Belə ki, flaqmanın yarımmüdafiəçisi Elçin Rəhmanov məsul görüş qabağı zədələnib. O, artıq komandanın son iki məşqini buraxmalı olub. Bu məsələni dəqiqləşdirmək üçün dünən Rəhmanovla əlaqə saxladıq. Elə Elçin də zədələnməsi barədə çıxan xəbərləri təkzib etmədi. Lakin zədəsinin bir o qədər də ciddi olmadığını və komanda ilə birgə Moskvaya gedəcəyini bildirdi. “Neftçi”nin 8 nömrəsi orada məşqlərə qoşulacağını və Tuayevin ona şans verməsi halında meydançaya da çıxa biləcəyini diqqətimizə çatdırdı. Hamı ekran qarşısına! Onu da əlavə etməyə dəyər ki, matç Bakı vaxtı ilə saat 21.00-da “Dinamo” stadionunda başlanacaq. Klubumuz Moskvaya bu gün səhər saatlarında gedəcək. İki gün orada qalaraq iqlimə və stadiona öyrəşməyi planlaşdıran “Neftçi” avqustun 5-də vətənə dönəcək. Görüşü Azərbaycan Dövlət Televiziyasının birinci kanalı canlı yayımlayacaq
